بنعيد الكلام تاني يا اخوانا ده كلام ناتج عن خبرة شخصية مش مجرد حشو للبوست...
مافيش حاجة اسمه صديق في الشغل,انت ممكن تطلع من الشغل بصاحب لكن مافيش صاحب جوة الشغل.مافيش تعبير انا ابن المكان( الا مع اصحاب الاعمال اللي يقدروك ويقفوا جنبك ويدفعوك لقدام,اللي زي دول تفني ذاتك عشانهم), معظم الاماكن والشركات لو لقوا زيك او احسن منك بمقابل مالي اقل , هيستغنى عنك فوراً,عشان كده طور في نفسك دايماً واطلب انه يتم تقديرك بالشكل المناسب وفقاً لقدراتك, ولو ما ماتوصلتش لأتفاق ولو لقيت فرصة احسن,خلص مهامك الموكلة ليك, وانسحب بأحترام , نفسك وبيتك هم أولى بأي لقمة عيش زيادة, الدنيا مش بطبطب على حد , اشتغل وثابر واكدح وهتلاقي المقابل اكيد.اعمل الشغل المطلوب منك واللي المفروض تعمله من غير ما تضحي بنفسك وتتصرف بروح الفارس وتشيل شغل حد زي زيه بتاخدوا مرتبات على مهام موكلة ليكم فبلاش الجدعنه اللي هتشيله مرة جدعنه هتلبسه على طول غصبنه.ما تقولش فلان ده جدع وانا اضمن شغله برقبتي , ما تأكدش جودة شغل حد غير شغلك وما تضمنش حد غير نفسك.ما تبنيش نتايج على خبرتك الشخصية في الشغل فكل اللي بيشتلغوا معاك بما فيهم اصحاب الاعمال همهم الاول دائماً وابداً مصلحتهم الشخصية ومكسبهم الشخصي ودول دايماً في تغير والا ماحدش كان خرج من بيته واشتغل.خلي بالك للتفخيم الزائد في قدراتك من قبل المديرين غالباً بيبقى السبب من وراها انك تعمل شغل اضافي او تقدم امتياز بدون مقابل عشان كده زي ما قولتلك دايماً وابداً اعرف قدراتك وامكانياتك واتصرف على اساسهم.لو جاتلك معلومة على طبق من دهب اتأكد منها الأول وماتقولش خالص كلمة انا سمعت , وقلل في كلامك مع زمايلك لأن بعض المرضى بيستغل الفضفضة والكلام مع الزملاء مكسب للترقي عند المديرين واصحاب الأعمال واللي هيكون ملخص فضفتك انك بتشيع الروح السلبية بين زملاء العمل وبتحرضهم على العصيان.ما تكسبش عداوة حد , ممكن اللي انت بتعاديه النهاردة يكون مديرك بكرة,فدائماً وابداً طلع علاقاتك الشخصية برة الشغل وماتخدمش حد بخدمة شخصية داخل نطاق العمل الا اللي تحس انه يستحق , لو جه موقف جوة الشغل ممكن اللي انت خدمتهم يبيعوك في ثانية لو تطلبت مصلحتهم , ويبقى ردهم ده شغل يا فلان يعني مافيهوش علاقات شخصية ودول اقذر واوسخ فئة ممكن تقابلها في مجال عملك ودول قابلت منهم كتيررررررررر جداااااً.سيب مشاكل شغلك برة بيتك ومشاكل بيتك برة شغلك , نفسك واسرتك ليهم حق عليك وبرضه المكان اللي كان سبب في رزقك بعد ربنا ليه عليك حق وازن الأمور وادي لكل واحد حقه.ماترهقش نفسك في الشغل زيادة عن اللزوم , لا انت هتورث من الشغل حاجة ولا هتاخد حاجة زيادة, بالعكس في فئة ما بتتعبش ولا بتشتغل وبتاخد وتتكافئ اكثر من اللي بيشقى وبيتعب وطبعاً كلنا عارفين الطريقة.ماتعظمش وتفخم في مديرك, لأنه زيه زيك , انسان يصيب ويخطئ مش آله يعني, اعرض افكارك بأحترام وبثقة في النفس وفي الاول والاخير القرار بأيده. لو حد جه عليك وخد حقك ما تزعلش وتنكد على نفسك وبيتك ولا تحرق في دمك,ماتسكتش عالظلم,اتكلم في حقك ودافع عنه بقوة وصلابة لأن ربنا اللي في ضهرك , عندك اللي اجمد منه؟! ولو حقك مارجعلكش ,دعوة المظلوم هيستجاب ليها وعقاب ربك شديد وده مش كلام بصبرك بيه وبطيب خاطرك , ده وعد آلهي موجود في كل الأديان , ربنا وعد المظلوم وقاله لأنصرنك ولو بعد حين.خلي بالك لو الشغلانة اللي انت فيها مرتاح لها نفسياً وفي فرق مقابل بسيط في شغلانة احسن (مادياً) خليك في الشغلانة اللي انت فيها الشغل مع ناس سالكة وسوية ونضيفة بيفرق جداً جداً والله...
إتق شر من أحسنت إليه قولاً وعملاً واقتصر, الشغل كدة كدة هيخلص بس النفسيات اللي مش سوية كفيلة انها تقفلك من ام الشغل والقعده فيه...بجد يارب تفهم...
الدنيا صغيرة قوي... وقصيرة قوي...
و بعد سنين شغل مع مختلف الجنسيات...
مدنيين وعساكر...
الدرس الي أتعلمته ان الشاطر المحترم ملوش في النفسنة
...
...الشاطر المحترم مش مؤذي
...
...الشاطر في حاله
...
...الشاطر المحترم مش بيسرق مجهود حد
...
...الشاطر المحترم بيشارك باللي يعرفه
...
...الشاطر المحترم بيتعلم مهما كبر
...
...الشاطر المحترم بيسأل عن اللي ميعرفوش
...
...الشاطر المحترم بأختصار واثق في نفسه و ثابت مكانه و مش محتاج غلوشة
...
...النفسنة و الأسلوب الوحش و سرقة المجهود و المعلومة الي بتطلع بالعافية و الأذية و الغرور دول حجة الضعيف الي عارف أنه ضعيف و بيغلوش بالحركات دي علشان يداري علي خيبته مش أكتر
...
...الكلام ده ينطبق علي نسبه كبيره جدااا من أول الي لسه بيشق طريقه في الشغل لحد أكبر مدير
...
...الدنيا مش مستاهلة علشان مرتب أكبر و لا علشان تكلبش في مكان أكبر منك....
لا يغار إلا الجاهل او الناقص ، لا يحسد إلا الفاشل او الجاهل ، لا يغتاب إلا المنافق او الضعيف، لا يثرثر إلا الفارغ....
اسعد الله مسائكم متابعيني الكرام
ليست هناك تعليقات:
إرسال تعليق